July | 2016 | 《那星世界》

Archive for July, 2016

是可忍也，熟不可忍也 ! 星期四晚上開始，樓下一路狂播搖滾音樂，直至第日四點半，其他住客可忍，公爵實在難忍，於是電郵管理公司及立案法團投訴。

結果管理公司話出信警告樓下業主，若然再犯會按法團罰則罰款。不過星期五晚樓下仍然食大麻，大聲播搖滾樂，嘭嘭嘭，話之你。無計，只有啞仔食黃蓮，有苦自己知。點知奇蹟出現，十點過後不久，樓下好似賣魚佬沖涼，無離腥（聲）氣。

原來法團主席，她住公爵嘅樓上，都受不了躁音滋擾，親自落公爵樓下視察，並致電本那比市的皇家騎警。不知騎警有沒到來及他們如何溝通，總之就此收了聲。星期六晚，大麻味依然，搖滾音樂照舊，不過差不多到十點就靜了下來。

阿彌陀佛，真主偉大，hallelujah，希望騎警啲皇氣真係可以止咳。最好連大麻都不敢在露台吸啦。

芥蘭頭，這大頭菜又名球莖甘藍，英文Kohlrabi。話說含豐富維他命，常食令人精神爽朗，能溫補內臟，解渴止咳。

講到食，用芥蘭頭製作的食譜很多，莖可做餸，葉可做作莎律。公爵尤其喜歡炒粒粒，就係芥蘭頭去皮切粒炒熟，伴以菜寶、腰果及蝦仁。鹹甜甘香爽味，都可在碟中嚐到，而且細細粒容易食，不妨試試。

今年試驗種芥蘭頭，用4公升牛奶樽落泥播種，果然生長，不但種大可供食用，而且現時可供觀賞，是盆栽精品。這品種種出圓形球體，青青綠綠，十分好睇，最大可達一磅一個。呵呵，真係唔捨得食住。

早前夫人有病，得鄰舍幫手，公爵曾慨嘆遠親不如近鄰。其實近鄰好就好，若然不好，那就是「神枱貓屎」。

神枱貓屎是廣東揭後語，意思是神憎鬼嚴。公爵府樓下最近住左啲神枱貓屎，他們吸食大麻，那大麻味真是中人欲嘔，想在露台賞下花都唔得。另外就係開大部音響聽搖滾音樂，嘭嘭聲，極難聽。週末俾佢嘭下都無所謂啦，點知佢變本加厲，尋晚一直嘭到晨早四點半，其他人唔駛瞓咩！

無計，只得向法團投訴，原來一提出，左鄰右理都話頂佢唔順。喂喂喂，頂唔順又唔早啲出聲? 管理公司話出違例通知信，若再犯就罰錢喎。唉，對啲咁嘅爛鬼，都唔知有無效。盡人事啦！